Góðar fréttir: baráttumaður fyrir réttindum frumbyggja í Mexíkó leystur úr haldi
Amnesty International fagnar því að mexíkóskur baráttumaður fyrir réttindum frumbyggja hafi verið látinn laus úr fangelsi eftir tveggja ára fangelsisvist fyrir upplognar morðákærur.
Dómari í Guerrero-ríki sýknaði Raúl Hernández föstudaginn 27. ágúst og var honum sleppt samdægurs úr fangelsi.
Málareksturinn gegn Raúl Hernández er hluti af herferð mexíkóskra stjórnvalda gegn félögum í Frumbyggjasamtökum Me'phaa (Organización del Pueblo Indígena Me’phaa, OPIM), sem berjast fyrir mannréttindum sínum.
Raúl Hernández lét svo um mælt: „Ég vil þakka Amnesty International og fólki í mörgum löndum sem barðist fyrir frelsi mínu“.
Amnesty International hefur barist fyrir því að Raúl Hernández verði leystur úr haldi frá því í nóvember 2008, en þá lýstu samtökin því yfir að hann væri samviskufangi.
Raúl Hernández
Um 116.000 Me’ phaa frumbyggjar búa í Guerrero-ríki í sunnanverðu Mexíkó. Þessir frumbyggjar búa við ein verstu lífskjör allra þjóðfélagshópa í Mexíkó að sögn mannréttindasamtaka sem starfa á svæðinu.
OPIM var stofnsett árið 2002 til að verja og efla réttindi Me’ phaa frumbyggja.
Amnesty International hefur fylgst með og skrásett hótanir og áreitni gegn félögum í réttindasamtökum frumbyggja í Guerrero-ríki um margra ára skeið.