Fréttatilkynning frá Íslandsdeild Amnesty International
Vegna fangaflutninga í "Stríðinu gegn hryðjuverkum"
Íslandsdeild Amnesty International lýsir yfir þungum áhyggjum af fréttum um að bandarískar herflugvélar hafi haft viðkomu hér á landi á leið sinni með fanga til landa þar sem vitað er að pyndingum er beitt við yfirheyrslur.
Íslandsdeildin vekur athygli á því að hið algera bann við pyndingum og illri meðferð felur einnig í sér algert bann við að flytja fanga til ríkis þar sem hætta er á að hann verði pyndaður eða látinn sæta grimmilegri, ómannlegri eða vanvirðandi meðferð[1].
Deildin skorar á íslensk stjórnvöld að gera það sem í þeirra valdi stendur til að koma í veg fyrir þau brot á alþjóðasáttmála SÞ gegn pyndingum sem slíkir fangaflutningar fela í sér, meðal annars með því að tryggja að Ísland sé ekki notað sem viðkomustaður í þessum tilgangi. Ennfremur hvetur deildin íslensk stjórnvöld til að beita sér á alþjóðavettvangi fyrir því að mannréttindi séu virt í “Stríðinu gegn hryðjuverkum”.
[1] Í þriðju grein samnings SÞ gegn pyndingum og annarri grimmilegri, ómannlegri eða vanvirðandi refsingu segir: “Ekkert aðildarríki skal vísa úr landi, endursenda eða framselja mann til annars ríkis ef veruleg ástæða er til að ætla að hann eigi þar á hættu að sæta pyndingum.”