Þeir mismuna. Við mótmælum. Það ber árangur
Ákvæði sem mismuna samkynhneigðum felld úr gildi í Nicaragua
Fulltrúar Verndarvættanna afhenda ræðiskonu Nicaragua áskorunina
Þann 13. nóvember sl. samþykkti þjóðþing Nicaragua ný hegningarlög þar sem „sódómaákvæði“ var fellt út. Þessi lagabreyting á sér stað í kjölfarið á miklum alþjóðlegum þrýstingi, m.a. frá Íslandi. Þann 10. september sl. fóru fulltrúar Verndarvættanna, sem er baráttuhópur Amnesty International og Samtakanna 78, á fund ræðiskonu Nicaragua, Margrétar S. Björnsdóttur, og báðu hana að koma bréfi áleiðis til yfirvalda í Nicaragua, þar sem þess var krafist að „sódómaákvæðið“, sem gerir kynmök milli einstaklinga af sama kyni að glæpsamlegu athæfi, verði fellt úr lögum. Fundurinn var þáttur í alþjóðlegum aðgerðum sem miðuðu að því að fá þetta lagaákvæði afnumið og báru þær árangur þann 13. nóvember en nýju hegningarlögin ganga í gildi í mars á næsta ári.
Bakgrunnur
Þann 11. júní 1992 samþykkti þjóðþing Nicaragua nokkrar breytingar á hegningarlögum ríkisins, sem allar lutu að kynferðisglæpum. Ákvæðum um „sódómsku“ var bætt við 204 gr. laganna en þau voru svo hljóðandi: „Hver sá sem stofnar til, hvetur til, flytur áróður fyrir eða stundar, á hneykslanlegan hátt, kynmök milli einstaklinga af sama kyni fremur „sódómsku“ og skal hljóta 1 til 3 ára fangelsisdóm.“ Þannig urðu kynmök fullveðja einstaklinga af sama kyni gerð ólögleg. Lagaákvæðið brýtur gegn mannréttindasamningum sem Nicaragua eru aðili að, m.a. Alþjóðasamningi um borgaraleg og stjórnmálaleg réttindi.