Einangrun og ill meðferð - meðferð farandverkakvenna í Jórdaníu
Tugþúsundir farandverkakvenna í Jórdaníu eiga á hættu að sæta einangrun, vinnuþrælkun og illri meðferð og njóta lítillar sem engrar verndar ríkisvaldsins. Farandverkafólk skiptir miklu fyrir efnahag Jórdaníu og eykur velsæld heimila þar sem það starfar og leggur eigin fjölskyldum og samfélögum til mikilvægar tekjur.
Margar farandverkakonur sæta vinnuþrælkun og illri meðferð:
- Margar vinna 16 til 19 klukkustundir á dag og fá enga frídaga
- Algengt er að þær sæti líkamlegu, andlegu og kynferðislegu ofbeldi
- Mörgum er í raun haldið föngnum á heimili vinnuveitandans
- Margar konur fá ekki borgað hluta launa sinna eða jafnvel öll laun sín, stundum í mörg ár
Atvinnulöggjöf í Jórdaníu veitti verkafólki sem vann á heimilum ekki sömu vernd og öðru verkafólki, þar á meðal tryggingu fyrir lágmarkslaunum, veikindaleyfum, eða frídögum. Lögunum var breytt til hins betra í sumar. Þing Jórdaníu samþykkti að vinna að löggjöf sem varðar farandverkafólk.
Þó að þetta sé skref fram á við þarf að gera meira til að tryggja að farandverkakonur njóti sambærilegra réttinda og kveðið er á um í alþjóðlegum mannréttindasáttmálum.
Hvettu ríkisstjórn Jórdaníu til að tryggja að ný löggjöf tryggi í raun réttindi farandverkakvenna.