Gríptu til aðgerða: þrýstu á Barack Obama að binda enda á pyndingar
Barack Obama
Barack Obama verður settur í embætti forseta Bandaríkjanna þann 20. janúar 2009. Margir bíða embættistöku hans með eftirvæntingu um stefnubreytingu Bandaríkjastjórnar í veigamiklum málum. Heimurinn mun fylgjast með og vænta jákvæðra breytinga í margvíslegum málum.
Amnesty International fer þess á leit við nýja forsetann að hann grípi til raunhæfra aðgerða til að sýna að ný Bandaríkjastjórn undir forystu hans muni virða alþjóðleg mannréttindi í baráttu sinni gegn hryðjuverkum.
Frá því árás var gerð á Bandaríkin þann 11. september 2001 hafa bandarísk stjórnvöld leyft og réttlætt mannréttindabrot í nafni þjóðaröryggis, þar á meðal ólöglega flutninga og varðhaldsvist, þvinguð mannshvörf, pyndingar og aðra grimmilega, ómannúðlega og niðurlægjandi meðferð.
Nýr Bandaríkjaforseti og Bandaríkjaþing verða að snúa við blaðinu. Barack Obama hefur þegar sagt að hann muni loka Gvantanamó og binda enda á pyndingar. Við erum ekki að fara fram á hið ómögulega.
Við höfum gátlista fyrir Barack Obama, forseta Bandaríkjanna, fyrir fyrstu 100 daga hans í embætti. Fyrstu skref hans ættu að vera að:
- tilkynna áætlun og dagsetningu um lokun Gvantanamó
- banna pyndingar og aðra illa meðferð í samræmi við alþjóðalög
- tryggja að óháðri rannsóknarnefnd verði komið á laggirnar, sem rannsaki brot bandarískra yfirvalda í „stríðinu gegn hryðjuverkum“
Þessum árangri er hægt að ná og þú getur hjálpað til. Farðu á www.obama100day.org í dag, skrifaðu undir ákallið og hvettu Obama til aðgerða.
LESTU MEIRA
Gátlisti fyrir nýjan Bandaríkjaforseta
USA: Counter Terror with Justice: A checklist for the next US President (5 November 2008)