Gríptu til aðgerða
Gríptu til aðgerða: þrýstu á stjórnvöld í Venesúela að verja mannréttindi kvenna!
Félagi í Amnesty International í Venesúelakrefst verndar og réttlætis fyrir konur í landinu
Í Venesúela þjást þúsundir kvenna sökum líkamlegs, kynferðislegs og andlegs ofbeldis af hálfu fjölskyldumeðlima. Árið 2007 hringdu um 4500 konur í hjálparlínu á vegum Stofnunar um málefni kvenna og báðu um aðstoð vegna ofbeldis.
Árið 2007 settu yfirvöld í Venesúela lög er kveða á um að allar konur eigi rétt á ofbeldislausu lífi. Lög þessi eru vissulega dýrmætt tæki til að efla aðgengi kvenna að réttindum sínum og bæta líf þúsunda kvenna. Hins vegar hefur framkvæmd laganna verið mjög ábótavant og því halda konur áfram að þjást. Konur hafa enn litla möguleika á að tilkynna misþyrmingar til yfirvalda og eru margar enn fastar í ofbeldisfullum aðstæðum.
Helsta ástæða þess að lítill árangur hefur náðst í að minnka ofbeldi gegn konum í Venesúela er skortur á athvarfi fyrir konur sem hafa sætt illri meðferð. Áðurnefnd lög frá árinu 2007 gera ráð fyrir að tryggja skuli öryggi þeirra kvenna sem sætt hafa ofbeldi en aðeins eru tvö athvörf á vegum stjórnvalda þar sem konur geta leitað skjóls. Um 10 milljónir kvenna búa í Venesúela og er mikil þörf fyrir fleiri kvennaathvörf.
Auk skorts á athvörfum verða konurnar að geta treyst sér til að tilkynna ofbeldi til lögreglunnar. Til að svo megi verða verður að upplýsa lögreglu landsins betur um innihald laganna og þjálfa hana í að taka vel á móti þeim konum sem vilja kæra ofbeldi. Lögin frá 2007 um rétt kvenna gera kröfu á stjórnvöld að ábyrgjast slíka þjálfun lögreglunnar. Það hefur hins vegar ekki gengið eftir og eru flestar lögreglusveitir óhæfar að eiga við mál sem varða ofbeldi kvenna.
Skrifaðu bréf og þrýstu á stjórnvöld í Venesúela að grípa til viðeigandi aðgerða til að verja rétt kvenna!
Prentaðu út bréfið hér að neðan og sendu til stjórnvalda í Venesúela:
