Gríptu til aðgerða: fóstureyðingabann í Níkaragva
Í kjölfar breytinga á hegningarlöggjöfinni í Níkaragva árið 2008 var blátt bann lagt við fóstureyðingu í öllum tilvikum, jafnvel þegar líf eða heilsa stúlkna og kvenna er í hættu vegna vandkvæða á meðgöngu eða þegar þungun er afleiðing nauðgunar.
Óréttmæt refsiákvæði laganna hindra þungaðar konur og stúlkur í að leita sér læknisaðstoðar í neyðartilvikum og setja heilbrigðissstarfsfólki þröngar skorður. Læknar eiga til að mynda á hættu að sæta fangelsi ef þeir grípa inn í aðstæður þar sem líf þungaðra kvenna eða stúlkna liggur við og slíkt inngrip leiðir óvart til fósturláts. Aukinheldur er of erfitt ef ekki ómögulegt í öllum tilvikum að sanna hvort kona hefur misst fóstur eða farið í fóstureyðingu.
Af þessu leiðir að þúsundir kvenna og stúlkna í Níkaragva sem ár hvert verða fyrir fósturmissi og heilbrigðisstarfsfólkið sem sinnir þeim í kjölfarið, eiga hættu að verða fyrir rangri sök og kærð fyrir fóstureyðingu
Amnesty International skorar á yfirvöld í Níkaragva að framfylgja skyldu sinni til að vernda, virða og uppfylla mannréttindi kvenna og stúlkna. Yfirvöld eru hvött til að ógilda nýju löggjöfina og tryggja að konur og stúlkur sæti ekki refsingu í kjölfar fóstureyðingar.
Gríptu til aðgerða: sendu bréf til stjórnvalda í Níkaragva !