Kambódía: Mittapheap 4 - 90 fjölskyldur hafa búið í vegarkanti í tvö ár
Hjálparákall maí 2009
Frá aðgerðum lögreglu gegn íbúum Mittapheap 4
Í yfir tvö ár hafa um 90 fjölskyldur búið við frumstæðar aðstæður í vegarkanti nærri þorpinu Sihanoukville. Þorpið er vinsæll áfangastaður ferðamanna. Þann 20. apríl 2007 neyddu öryggissveitir fjölskyldurnar til að yfirgefa þorpið Mittapheap 4 (sem er líka kallað Spean Ches) í kjölfar landdeilna. Lögregla, þar á meðal herlögregla, brenndi hús fólksins, skaut af byssum og barði þorpsbúa með kylfum. Átján þorpsbúar særðust, þrettán karlar og fimm konur, sem og tveir lögreglumenn. Flestar eigur þorpsbúa voru eyðilagðar.
Lögregla handtók síðan mennina þrettán og ákærði þá fyrir líkamsárás og eignaspjöll. Réttað var yfir þeim dagana 3.-4. júlí 2007, en dómstóllinn athugaði ekki lögmæti lögregluaðgerðanna né reyndi að ákvarða hver bæri ábyrgð á ofbeldinu og eignaspjöllunum. Níu þorpsbúar voru dæmdir í fangelsi allt að átta mánuðum, þrátt fyrir að ákæruvaldið hafi ekki lagt fram nein gögn sem tengdi fólkið við glæpina, sem það sætti ákæru fyrir.
Íbúar Mittapheap 4 búa við vegarkant við bágbornar aðstæður
Fjölskyldurnar eru enn á vergangi og eiga erfitt með að sjá sér farborða þar sem ræktarland þeirra var tekið af þeim og eigur þeirra eyðilagðar, þar á meðal fiskinet. Engin vatnsleiðsla með drykkjarvatni er í bráðabirgðaskýlunum og erfitt að sinna lágmarkshreinlæti. Mörg barnanna þjást af kvefi, hita og niðurgangi vegna aðbúnaðarins. Eina aðstoðin sem fólkið hefur fengið er frá félagasamtökum á svæðinu og landsvæðið, þar sem þorpið var staðsett, er nú afgirt og ónotað.
Hér að neðan eru bréf sem þú getur prentað út og sent til stjórnvalda: