Við höfum sögur að segja

16.8.2017

 „Allir geta verið jákvæðir í garð Amnesty International því samtökin starfa í þágu fólksins en ekki til að hagnast á því,“ segir hinn 26 ára gamli Majid Zarei frá Íran sem hefur búið á Íslandi í rúmt ár og ætlar að hlaupa 3 km í Reykjavíkurmaraþoninu nú á laugardaginn til styrktar Amnesty International.

Majid, sem er flóttamaður, er einn þeirra sem tók þátt í myndbandinu Velkomin - Horfumst í augu sem eflaust margir landsmenn sáu á sjónvarpsskjánum í vetur en Íslandsdeild Amnesty International lét framleiða myndbandið í tengslum við herferð samtakanna í þágu flóttafólks.

„Ég tók þátt í myndbandinu því ég vildi leggja mitt af mörkum til að hjálpa Íslendingum og útlendingum að ná betur saman,“ segir Majid. „Ég hef eignast marga góða vini á Íslandi en ég veit að það eru margir sem flutt hafa til landsins, hvort heldur sem er flóttamenn eða aðrir útlendingar, sem hafa átt erfitt með að kynnast Íslendingum. Ég tel að það myndi gera öllum gott, bæði þeim aðfluttu og íslensku samfélagi, ef fólk reyndi að kynnast betur. Við höfum öll sögur að segja sem okkur langar að deila.“

Majid_f_sidu

Majid segir það hafa verið jákvæða reynslu að taka þátt í myndbandinu og að fólk hafi sagt honum að myndbandið hafi breytt sýn sinni á flóttafólk. „Ég held að ef fólk sem þekkir okkur ekki og hefur kannski einhverja fordóma myndi setjast niður með okkur og heyra okkar sögur, hver við erum og hvaðan við komum, þá myndi viðhorf þess breytast.“

Majid segist ánægður á Íslandi og sé farinn að líta á sig sem örlítið íslenskan. Hann borðar meira að segja hrossakjöt! Hann á góða vini og er ánægður í starfi en hann vinnur hjá byggingarfélaginu Eykt sem byggingatæknifræðingur. Og nú ætlar hann að taka þátt í Reykjavíkurmaraþoninu líkt og þúsundir annarra. Þrátt fyrir að vera ekki mikill hlaupaáhugamaður hlakkar hann til að vera með og hlaupa til góðs.

Majid og Íslandsdeild Amnesty International skora á vini og samstarfsfólk Majids að heita á hann í Reykjavíkurmaraþoninu og styðja þannig við mannréttindabaráttuna. Hægt er að heita á Majid og aðra Amnesty-hlaupara hér.

Til baka